Pse ndodhi Krishtlindja?

5 Dhjetor

prej John Piper

Pse ndodhi Krishtlindja?

Dhe ju e dini se ai u shfaq për të hequr mëkatet tona; dhe në të nuk ka mëkat… prandaj është shfaqur Biri i Perëndisë: për të shkatërruar veprat e djallit.

1 Gjoni 3:5, 8

Dy herë tek 1 Gjoni 3:1-10 na tregohet pse ndodhi Krishtlindja – domethënë se Biri hyjnor i përjetshëm i Perëndisë erdhi në botë si njeri.

Në vargun 5 Gjoni thotë, “Dhe ju e dini se ai u shfaq për të hequr mëkatet tona; dhe në të nuk ka mëkat.” Kështu afirmohet pamëkatshmëria e Krishtit – “në të nuk ka mëkat.” Arsyeja për ardhjen e tij afirmohet gjithashtu, “ai u shfaq për të hequr mëkatet tona.”

Pastaj në pjesën e dytë të vargut 8 Gjoni thotë, “prandaj është shfaqur Biri i Perëndisë: për të shkatërruar veprat e djallit.” Fokusi i veçantë që ka Gjoni në mendje kur thotë “veprat e djalit” është mëkati të cilin Djalli e nxit. Këtë gjë e shohim në pjesën e parë të vargut 8, “Kush kryen mëkat është nga djalli, sepse djalli mëkaton nga fillimi.” Prandaj veprat e Djallit të cilat Jezusi erdhi t’i shkatërrojë janë veprat e mëkatit.

Gjoni na thotë dy herë që Krishtlindja ndodhi – Biri i Perëndisë u bë njeri – për të hequr mëkatin, apo për të shkatërruar veprat e Djallit, domethënë mëkatin. Jezusi lindi prej një virgjëreshe përmes Frymës së Shenjtë (Mateu 1:18-20), “rritej në dituri, në shtat dhe në hir përpara Perëndisë dhe njerëzve” (Luks 2:52) dhe ishte përsosmërisht i bindur dhe i pamëkat në gjithë jetën dhe shërbesën e tij, deri në vdekje, madje deri në vdekje të kryqit (Filipianëve 2:5-8; Hebrenjve 4:15) – në mënyrë që të shkatërronte veprat e Djallit – të largonte mëkatin.

Mëkatin tonë. Bëjeni këtë gjë tuajën dhe duajeni Jezusin për këtë arsye. Merrni vetë fjalët e Palit dhe bëjini tuajat. “Dhe ajo jetë që tani jetoj në mish, e jetoj në besimin e Birit të Perëndisë, që më deshi dhe dha veten për mua” (Galatasve 2:20). Kështu ai i shkatërron veprat e Djallit dhe na çliron prej mëkatit tonë. Mos lejoni që Krishtlindja të jetë abstrakte për ju. Mëkati juaj. Konflikti juaj me Djallin. Fitorja juaj. Këto janë arsyet përse ai erdhi.